Skip to main content

Gurean Gaur

Kronologia - Ziklo armatuaren itxiera

2018-05-03

Sortu zenetik 60 urtera itxi du ETAk borroka armatuaren zikloa. Kronologia honetan bildu ditugu erakundearen ibilbideko une esanguratsuenak.

Lurdes Imaz: "Prest gaude LOMCE legea ez aplikatzeko baina Jaurlaritzaren babesa behar dugu"

2013-10-09

Gurean Gaur saioaren elkarrizketa atalean, Lurdes Imaz Euskal Herriko Ikasleen Gurasoen Elkarteko ordezkariarekin hitz egin dugu LOMCE legearen inguruan. LOMCE edo Wert legea ikastetxeetan ez aplikatzeko prest daudela baieztatu zuen, hori bai, horretarako eragile guztien babesa beharko zuten baita Eusko Jaurlaritzarena ere.

Merkatal gune handien aurkako elkarretaratzea egin dute Donostiako udaletxean

2018-07-17

2015ean, Auzitegi Gorenak EAEko Ekipamendu komertzial handiak erregulatzen zituen Lurralde Plan Sektoriala bertan behera utzi zuen. Plan honek merkatal gune berrien eraikuntzari limiteak jartzen zizkion, baina Europako konpetentzia librearen aurka zihoala argudiatuz, ezerezean geratu zen. Ingurugiroa, urbanismoa edo kontsumitzaileen defentsa bezalako interes orokorrak jokoan daudenean merkatal gune berrien eraikuntzari eta anpliazioari limiteak jartzea zilegi dela adierazi dute Auzitegi Gorenak eta Europar Batasunak. Horregatik, merkataritza ekipamendu handiak antolatzeko Lurralde Plan Sektorialaren berriztapena eta anpliazioetarako lizentzia emateak gelditzea eskatu dute bizilagunek. Hiriko antolamenduko plangintza orokorrean edozein aldaketa egin ahal izateko ingurumenak jasan ditzaken eraginak ez ezik, plangintza berriaren inpaktu sozioekonomikoa aztertzen duten azterketa berrituak nahitaezkoak izatea aldarrikatu dute elkarretaratzean. Merkataritza gune handiak gizartearen interes orokorraren aurka doazela eta gehiago egitea ingurugiroarentzat oso kaltegarria izango dela azaldu dute. Planifikatuta dauden merkataritza eremu berriek, beteta dauden lur sailen bikoitza suposatzen dutela eta merkatari txikien eta handien arteko oreka guztiz apurtuko dela salatu dute. Bittor Lizarribar, Euskaldendak konfederazioko presidenteak, merkataritzarentzat eta gizartearentzat egoera larria dela salatu du. Horrelako kasuetan benefizioak lortzen dituen bakarra udaletxea dela ere argitu du Lizarribarrek. Donostiako udaletxean egindako elkarretaratzean, udalean ordezkaritza duten taldeei dei egin diote, martxan jarriko diren anpliazioekin zentzudun jokatu dezaten. Udal Gobernuari eta Eusko Jaurlaritzari herritarren hitza entzuteko eta gizarteak nahi duena kontuan izateko ere eskatu diote.

Bilbora iristen diren errefuxiatuentzako baliabideak bermatzeko eskatu dute

2018-07-17

Izan ere, Bilbora iritsitako 47 lagunek seigarren gaua pasatu dute Atxuriko kantxetan, bertako auzotarrek harrera eginda. Atxurigorri elkarteko kideak dira horretaz arduratzen ari direnak, eta jakinarazi dute migranteetako batzuk beste herri batera joateko asmoa badute ere, gainerakoek Bilbon geratu nahi dutela. Elkarteak egoera hori salatu du agintarien aurrean; alde batetik, migratzaileen beharrei ez dietelako behar bezala erantzuten, eta, bestetik, martxan jarri diren dispositiboak, nahikoak ez direlako.

Joan den astean, Gurutze Gorriak 88 plazako aterpetxe bat egokitu zuen, baina hiru egunez soilik egon daitezke bertan. Ongi Etorri Errefuxiatuak plataformak lehenago ere salatu du Bilboko Udalak eskaini duen zerbitzu bakarra Gurutze Gorriak erabiltzen duen 48 oheko aterpetxe bat izan dela. Lo egiteko eta gosaltzeko aukera eskaintzen dietela soilik eta bi gautan soilik erabil dezaketela.

Hain justu, aterpetxe horretan beste 40 lagunentzako lekua bermatu dute erakunde publikoek. Eta Eusko Jaurlaritza, Bizkaiko aldundia eta Bilboko Udalaz gain, Gurutze Gorria, CEAR-Euskadi eta Munduko Medikuak elkarteek ere parte hartu dute. Administrazio bakoitzak egin duen ekarpen ekonomikoari dagokionez, 100.000 euro Jaurlaritzak jarri ditu; 30.000, diputazioak; eta 20.000, udalak.

Badirudi, ordea, ez dela nahikoa eta Atxuriko kantxetan hartu dituzten hamarnaka migranteak horren erakusle. Hargatik, egoera konpontzeko beharrezko baliabideak exijitu dizkie Ongi Etorri Errefuxiatuak plataformak erakunde publikoei.

UNICEF Euskal Herriko Batzordeak "Aliaods" aliantza sinatu du 15 komunikabiderekin

2018-07-17

UNICEF-eko Euskal Herriko Batzordeak komunikabide autonomiko eta lokalen aliantza aurkeztu du Gernikan. “Aliaods” izenpean, Euskadin aritzen diren 15 komunikabide eta komunikazio taldek sinatu dute UNICEF-ekin hitzarmena. Helburua, Garapen Iraunkorrerako 2030 Agendaren alde aritzea eta Garapen Iraunkorrerako Helburuen inguruan sentsibilizatzea. Isidro Elezgarai Batzordeko presidenteak, arreta berezia jarri nahi izan du ume eta gazteetan eta elkarlanaren garrantziaz aritu da ere.

Crida Nacional, independentziarako Puigdemonten tresna berria

2018-07-17

Bartzelonako Ateneun aurkeztu zuten astelehenean Crida Nacional egitasmoa, proiektu subiranista berria. Gemma Geis JxCateko diputatuak eta Ferran Mascarell Generalitateko ordezkariak irakurri zuten manifestua. Quim Torra Generalitateko presidentea ez zen egon, Alemaniatik hartzekoa zuen hegazkina atzeratu egin baitzen eguraldi txarragatik. Telefono bidez hartu zuen parte. 

Puigdemont bideokonferentzia bidez izan zen aurkezpenean, eta Jordi Sanchez JxC Junts per Catalunya alderdiko liderrak, berriz, gutun bidez eman zuen azalpena. Puigdemonten, Torraren eta Sanchezen ekimenez sortu dute Crida Nacional «mugimendu politiko tranbertsala». Zenbait plataformari zuzenean lotutako mugimendua da: 1-O mugimenduarekin eta Junts per la Republicarekin, esaterako. Puigdemonten hitzetan, plurala eta anitza izan nahi duen errepublikarako bidea egitera doaz. 

Mugimenduak hartuko duen noranzkoa zehazteke dago oraindik, baina baliteke hilabete batzuk barru alderdi politiko bilakatzea. Webgune bat irekiko dutela egitura juridikoa erabakitzeko, eta udazkenean egingo duten bileran hartuko dutela azken erabakia. Forma juridikoa zehaztuta, martxan jarriko dute proiektua. Mugimenduaren helburu nagusia «lanabes politikoa eta transbersala» izatea da. Hau da, egungo alderdiez harago joan eta horiek bildu nahi ditu proiektuak.

 
bannerra

bannerra